Schnitzelbangg 2000

D Seoul hett unsre Ogi Dölfi
Schwyzerzyt zirka am zwölfi
broletet und e grossi gfiert
e bitzli dummm gschwätzt, lamentiert
am Färnseh hesch en kenne heere
mit Versprächige, - und zwoor leere
liebe Schweyzer, duet är brichte
gloubt an mich, ich werd's euch richte
wenn die vom I.O.C, ich verzell euch kein Seich
mich schwätzen hören, dann werden die weich
so kersch en als wie wyter prahle
und iber alli Bagge strahle
Zum Samaranch sait är grad zerscht
tschou mein Freund, - Freude herrscht!
Me hett e Film vom Wallis zaigt
drno hett sich dr Dölf vernaigt
siigessicher gsehsch en portze
und vor Sälbschtvertraue schtrotze
är maint druff abe wie in Trance
gäge üs Schweyzer, hett niemer e Chance
zum Hodler sait'r; d'Mässer si gwetzt
jetzt, hett sich dr Ogi es Dänkmol gsetzt
mir leit e kene Stei i Wäg
hinter mir steiht nämmlig ganz Kanderstäg
das düe mer denn scho ane biege
das mir die Spiil i ds Wallis griege
In Sion hänn si d'Fahne gschwunge
und im Chor, Dölf Ogi gsunge!
Druff hett Turin dr Uftritt ka
mit Glimmer, Glanz und Gloria
e blondi Biine, isch erschiine
mit Minirogg und lange Schiine
wo d'Jury die gseht, life vor Ort
hänn si an alles dänggt, - nur nit an Sport
ihri Kurve und s'Erschiinigsbild
macht die seniile Brieder wild
si hänn sich denn no kurz berote
und gänn Turin die besser Note
Wo's denn usskunt wer und wo
hett dr Dölfli e rote Grind beko
vor Wuet hett's ihn denn fascht verrisse
die hei betroge und hei bschisse
die Entscheidig isch e Schand
dasch e Kataschtroofe für üses Land
ich lasse mich nicht länger reizen
denen Italiäner werd ich unteren heizen
är deybelet und macht ai Gschrey
Mir Sprysse gsehn das nit so äng
mer nämmes logger und nit sträng
mer fraye ys uf die drey schenschte Dääg
und hoffe mer blyybe gsund und zwääg!

Fir uns isch's e lapalie
no geehn halt die Spiil no Italie!