D’Aktie falle, d’Verluscht sin luusig und dr Deyfel frayt sich gruusig!
Jä, jä, als Deyfel ka mi freue Kei Unheil duen ych je bereue Wenn’s neyme knallt und Lämpe git Freu ych mi tierisch, find’s e Hit Ych lieb halt liege, stähle, provoziere Betriege, due gärn schigganiere S’git doch nit scheeners, wenn uf Ärde D’Mensche suur und hässig wärde Wenn ame Haimspiil vom F.C.B Sich d’Fan dien ufe Ranze geh Wiete, klopfe und versohle Do kann ych kraye, stampfe, johle Duet dr Ebner, dä Halungg Krämpfli draye, macht nit als Stungg Schnurrt vo BZ und siner BK Vision Dä hochkotzt Trottel und Pausegloon Denn bin ych Stolz, grieg Fraydeträne Ka in dr Höll, - in Liigstuehl läne Das gfallt mir halt, so han ys gärn Bi happy, wie uf emen andere Stärn Dien d’Lyt in d’Börse inveschtiere Im Multipagg Aktie scheffle, nyt studiere Wie zem Byschbyl do, dä Ueli Fischer Crossair Aktie, - e Dubel isch’r Denn halt ych mi im Hintegrund Gniess es, lach mi halber wund Und jaggts denn d’Charts in Käller abe Kann ych mi göttlig dra erlabe Mir gfallts halt, wenn ys Volk ka negge Gseh voller Gnuss dr Stutz verregge Wenn d’Börse richtig dätscht kracht No waiss y, ych has richtig gmacht Git’s Panik, Plaite und ai gschrey Denn bin y glügglig, furchtbar frey Für mi isch denn dr ganzi Lohn Konkürs und Plaite, - Rezession Do kan ych frayde Sprüngli mache Luthals, schallend, dr Buggel voll lache Ych lieb, Verbrächer, Strolche, Bschisser Ain guete Fründ haisst Dr. Brugisser Ob Honegger, Hüppi, Gut, - s’sin alli erkore Das teent halt wie Muusig in den Ohre Au dr Ospel, - dä scharfi Bogg Gseht är e Rogg - und griegt e Schogg Duet fir sich und sy Performence alles geh Ka drfür dr Gwinn nach nüün Monot seh Das isch my Handwärgg, das duet wohl Dämm sait men uf Dytsch, - en Aigegool Gsehn ych so Gschichte, duets mer wohle Y Ka dräggig lächle, - ganz verstohle Bi starg und niemols z’unterschetze Bissig, due gärn d’Heerner wetze Wenn ych nur Unrueh ka verbraite Alles, in falschi Bahne laite Denn han ych doch my Zyyl erraicht Wenn’s allne ufe Deggel saicht Drumm sag ys nomol, s’isch gar nit luusig Yber Unhail, frey mi immer – und zwoor gruusig!