25 isch die magischi Zahl kumm, gamble im Spryss-Casino de Bâle
Aentli, äntlie isch's sowyt mer hänns jetz gschafft, ganz ohni Stryt e jede Bebbi weiss jetzt wo är mit sym Sold ka ane go im Spryss-Cassino duets rentiere do kasch di Klotz guet inveschtiere hey, Winner-Typ, hesch muet im Ranze Spiil mit uns und gang ufs ganze Nimm e Lappe us em Sagg mer mache drey druss, s'goht zagg zagg do inn muesch zerscht e bitz riskiere denn kasch grausam abkassiere ob Black-Jack oder Roulette Tisch das isch fir di e glaine Fisch kasch au, das waiss e jede Depp Millione mache bim tschau Sepp ob Full-House, glaini, grossi Schtross bi uns isch immer ebbis los wie wärs zem Bischbyl, du glatte Tschooli mit ere rundi Monopoly du gsehsch, de kasches draye, drülle und mit allem, - di Gäldsagg fülle los jetz muesch nimm wyter dööse ab an d'Kasse, Jeton lööse wirf di dry, ins Gewimmel denn bisch gly im siibte Himmel wenn's di raizt bis unter d'Rippe dien d'Sprysse sogar bim Poker strippe als novum hänn mir, ganz ohni saich e zweiarmige Bandit, do wirtsch grad blaich wenn'd no lang duesch Zyt verliere kas verglemmi nit rentiere mir hänn doch alli s'grosse Laschter und zem Läbe, z'wenig Zaschter drumm hänn mer ebbis unternoh und wann in Offensive goh bi uns kasch au, darfsch nit vergässe gratis hogge, suffe, frässe kumm jetz iine, mach kai gfasel mir sinn s'erscht Casino z'Basel mir glatte Sieche grampfe tüchtig wenn'd aimol kunsch, wirsch von ys süchtig jetzt griegsch e Gratis-Typ, - e haisse denn machsch e Saugwinn ganz e faisse gang ans Roulette, hesch d'Qual der Wahl und setz deert uf die richtig Zahl probiers mit dr Zwai, wie wärs mit dr Zäh oder miesstisch ächt doch ebbe s'Vierzäh näh Siibe, Fufzäh, Ainezwanzig gäll, Bebbi s'macht di stutzig, ranzig nai, mer wänn di nit wyter bloge und no s'ganze hinterfroge s'isch umme mit dr frogende Qual s'Finfezwanzig, isch doch die magischi Zahl die Zahl hett's nämmlig in sich, liebe e viertel Joorhundert, die mir dr Cortège schiebe muesch jetz nit bleed zer Wösch usluege haut's di um ud us de Fuege Digge, gäll jetz gfallt's dr nimme gsehsch di Gwinn, dr Bach abschwimme doch dängg dra, - fir di isch's ellai e Gwinn dass d'äntlig waisch, - wär d'Schopf-Sprysse sin!